ថៃ៖ ក្រុមមន្ត្រីប៉ូលីសថៃ នឹងធ្វើការចាប់ខ្លួនអតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត្រា ភ្លាមៗនៅពេលដែលគាត់ត្រឡប់មកដល់ប្រទេសថៃ តាមរយៈអាកាសយានដ្ឋានដុនមឿងនៅថ្ងៃអង្គារស្អែកនេះ។ នេះបើយោងតាមសារព័ត៌មាន The Nation។

ផែនការត្រៀមនៃការចាប់ខ្លួនលោក ថាក់ស៊ីន ដោយប៉ូលិស និងនាយកដ្ឋានកែតម្រូវថៃនេះ ក្រោយទទួលបានដំណឹងពីកូនស្រីរបស់លោក ថាក់ស៊ីន គឺលោកស្រី Paetongtarn Shinawatra បានសរសេរនៅលើ twitter របស់លោកស្រីថា៖ «ថ្ងៃអង្គារ ទី២២ ខែសីហា ម៉ោង៩ព្រឹក នៅដុនមឿង ដើម្បីទៅទទួលឪពុកថាក់ស៊ីន»។

យោងតាមប្រភពដដែលបានឱ្យដឹងថា ប្រសិនបើលោក ថាក់ស៊ីន មកដល់ក្នុងម៉ោងតុលាការកំពុងធ្វើការ គាត់នឹងត្រូវបញ្ជូនទៅផ្នែកព្រហ្មទណ្ឌនៃតុលាការកំពូល សម្រាប់អ្នកកាន់ការិយាល័យនយោបាយ មុនពេលដែលមន្ត្រីនាយកដ្ឋានកែប្រែបញ្ជូនទៅពន្ធនាគារ Remand នៃទីក្រុងបាងកក។

ទន្ទឹមនោះ ប្រសិនបើលោក ថាក់ស៊ីន មកដល់ក្រោយម៉ោងតុលាការ គាត់នឹងត្រូវគេនាំទៅប៉ុស្ដិ៍ប៉ូលីស ជាកន្លែងដែលលោកនឹងត្រូវឃុំខ្លួនបណ្ដោះអាសន្ន មុនពេលដែលលោកត្រូវបាននាំទៅតុលាការកំពូលនៅព្រឹកបន្ទាប់។

ប្រភពដដែលឱ្យដឹងទៀតថា នៅពេលលោក ថាក់ស៊ីន មកដល់ទឹកដីប្រទេសថៃ លោកនឹងត្រូវប៉ូលីសអន្តោប្រវេសន៍ចាប់ខ្លួន ហើយបន្ទាប់មកនឹងនាំទៅកាន់ប៉ុស្តិ៍ប៉ូលីសដុនមឿង ដើម្បីធ្វើកំណត់ហេតុចាប់ខ្លួន ហើយលោកនឹងត្រូវនាំខ្លួនទៅកាន់ផ្នែកព្រហ្មទណ្ឌនៃតុលាការកំពូល។

គួរឱ្យដឹងដែរថា អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា ដែលនិរទេសខ្លួនឯងនឹងត្រូវប្រឈមមុខនឹងការជាប់ពន្ធនាគារសរុបចំនួន ១២ឆ្នាំ ក្នុងករណីសំខាន់ៗចំនួន៣ ប្រសិនបើគាត់ត្រឡប់ទៅប្រទេសថៃវិញនៅថ្ងៃទី២២ ខែសីហា ឆ្នាំ២០២៣ ស្អែកនេះ បន្ទាប់ពីរយៈពេល ១៥ឆ្នាំ ដែលលោករស់នៅនៅបរទេស៕